11 iyun 2024-cü il tarixində F.Köçərli adına Respublika Uşaq Kitabxanasının təşkilatçılığı ilə Dünya Azərbaycanlıları Konqresinin üzvü, hazırda Macarıstanda yaşayan azərbaycanlı uşaq yazarı Almaz Cəlilovanın (Almaz Xatun) “Dəcəllər” adlı şeirlər kitabının təqdimatı keçirilib. Təqdimatda 151 nömrəli tam orta məktəbin 4-cü sinif şagirdləri iştirak edib. 

Elmi işlər üzrə direktor müavini Zahirə Dadaşova çıxışında qeyd edib ki, yazıçı Almaz Xatunun “Dəcəllər” kitabında siz, az yaşlıların maraq dünyası, həyat tərzi, onların böyüklərə, təhsilə, təbiətə olan məhəbbət və sevgisini görəcəksiniz. “Dəcəllər dünyası”nın qəhrəmanları olan bərbəzək sevən Süsən, nazlı Fizzə və öyrənmək həvəsli Ələkbər özünəməxsus xasiyyəti ilə sizlərdə maraq oyadacaq. Həmçinin şeirlərin məzmununa uyğun şəkillərin verilməsi kitabı daha oxunaqlı, cəlbedici edir.

Sonda məktəblilər xaricdə yaşayan uşaq yazarına işlərində və fəaliyyətində uğurlar arzu ediblər.