10 dekabr 2024-cü il tarixində F.Köçərli adına Respublika Uşaq Kitabxanasında “12 Dekabr - Ulu Öndər Heydər Əliyevin Anım Günü”nə həsr olunan “Heydər Əliyev - əbədi və tarixi şəxsiyyət” adlı tədbir keçirilib. Tədbirdə 270 nömrəli tam orta məktəbin müəllim və şagirdlərinin iştirakı ilə uşaq yazarı Zahirə Cabirlə görüş keçirilib və onun müəllifi olduğu “Böyük Azərbaycanlı” kitabı haqqında məktəblilərə ətraflı məlumat verilib.

Ümummilli Lider Heydər Əliyevin, Azərbaycanın ərazi bütövlüyü uğrunda canlarını fəda etmiş şəhidlərimizin əziz xatirəsi 1 dəqiqəlik sükutla yad edildikdən və Azərbaycan Respublikasının Dövlət Himni səsləndirildikdən sonra kitabxananın direktoru tədbiri açıq elan edib. 

Şəhla Qəmbərova “Böyük Azərbaycanlı” kitabı haqqında qeyd edib ki, bu kitabda Ulu Öndərin şanlı həyat yolu real tarixi hadisələr əsasında işıqlandırılmışdır. Kitabdakı hekayələr bütün ömrünü sevdiyi xalqına, onun müstəqilliyinə həsr edən, xalqın sevgisi ilə ucalan şəxsiyyət – Heydər Əliyevə həsr olunub. Uşaqlar üçün nəzərdə tutulmuş kitabdakı hekayələr Ümummilli Liderin şanlı həyat yolunu kiçik oxuculara daha yaxından tanıdacaq.

Yazıçı Zahirə Cabir çıxışında qeyd edib ki, kitabı yazmaqda məqsədi milli dəyərləri qorumaq, Ümummilli Liderin yüksək mənəvi keyfiyyətlərini oxuculara çatdırmaqdır. Sonra yazıçı uşaqlara kitabdan hekayələr oxuyub.

Tədbirin davamında 270 nömrəli tam orta məktəbin şagirdlərinin ifasında Heydər Əliyevin müdrik kəlamları, onunla bağlı şeirlər səsləndirilib, səhnəciklər təqdim edilib.

Tədbirin keçirilməsində məqsəd məktəblilərə Heydər Əliyev irsini tanıtmaqdır.