25 aprel tarixində F.Köçərli adına Respublika Uşaq Kitabxanası  və 1 nömrəli Uşaq və Gənclər İnkişaf Mərkəzi  birgə əməkdaşlıq çərçivəsində Azərbaycan ədəbiyyatının aparıcı siması kimi tanınan, görkəmli Azərbaycan şairi və mütəfəkkiri, ədəbiyyat tarixində divan janrının ən möhtəşəm nümayəndələrindən biri Məhəmməd Füzulinin 530 illik yubileyinə həsr olunmuş “Füzulinin qəzəliyyat dünyası” adlı ədəbi-bədii gecə keçirilib.Tədbirdə Filologiya üzrə fəlsəfə doktoru, dosent, AMEA-nın akademik Z.Bünyadov adına Şərqşünaslıq İnstitutunun elmi işlər üzrə direktor müavini Ruhəngiz Cümşüdlü, flologiya üzrə fəlsəfə doktoru, dosent Lalə Əliyeva,  sənətşünaslıq üzrə fəlsəfə doktoru, dosent, bədii qiraət ustası Məleykə Alıoğlu qonaq qismində iştirak ediblər.

Kitabxananın fəal oxucuları və digər qonaqların  iştirak etdiyi tədbirdə Füzulinin həyat və yaradıcılığından, onun əsərlərinin   təkcə Azərbaycan poeziyası üçün deyil, bütövlükdə Şərq ədəbiyyatı, eləcə də dünya ədəbiyyatı üçün əhəmiyyətli olduğundan söz açılib və video slayd izlənilib. Bəstəkar Cahangir Cahangirovun “Füzuli kantatası”ndan “Şəbi hicran” musiqi parçası ifa edilib. Mərkəzin dərnək üzvləri, o cümlədən görmə məhdudiyyətli gənc ədəbiyyatsevərlər tərəfindən səsləndirilən dahi şairin qəzəlləri və poemalarından parçalar qonaqlara zövqlü dəqiqələr yaşadıb. Tədbirin sonunda  iştirak edən dərnək üzvlərinə təçəkkürnamə təqdim edilib.