30 aprel 2024-cü il tarixində F.Köçərli adına Respublika Uşaq Kitabxanası və 281 nömrəli tam orta məktəbin birgə təşkilatçılığı ilə Azərbaycan şairi, yazıçı, mütəfəkkir Məhəmməd Füzulinin anadan olmasının 530 illik yubileyi münasibəti ilə tədbir keçirilib. Kitabxana əməkdaşları, müəllim, valideyn və məktəblilərin iştirak etdiyi tədbirdə şairin qəzəlləri haqqında məlumat verilib, Füzuli poeziyasının Azərbaycan dilinin inkişafındakı rolundan bəhs edilib.
Tədbirdə məktəblilər Füzulinin Azərbaycan dilində yazdığı “Meyvələrin Söhbəti” adlı alleqorik poemasına aid səhnəcik təqdim ediblər. Füzuli “Meyvələrin Söhbəti” adlı əsərində yersiz qürur edən, öz məziyyətlərini tərifləyən meyvələrin mübahisəsini göstərmişdir. Meyvələrin xassələri və onların hər birinin insan orqanizminə təsirini gözəl bilən şairin bu əsəri, zahirən uşaqlar üçün yazılmış sadə əsər kimi görünsə də öz fəlsəfi-nəsihətamiz ruhu ilə diqqəti cəlb edir.
