2-5 fevral tarixində Respublika Uşaq Kitabxanasına Abşeron rayonu Qobu qəsəbə 3 nömrəli tam orta məktəbin 1-ci sinif şagirdlərinin ekskursiyası təşkil olunub. Öncə kitabxana əməkdaşı məktəbliləri kitabxana ilə yaxından tanış edib, “kitab oxumaq nə üçün lazımdır?”, mütaliə mədəniyyəti və vərdişləri haqqında ətraflı məlumat verib. Kitabxananın kiçik oxu zalında Firidun bəy Köçərlinin Azərbaycanda uşaq folklorunun ilk antologiyası olan "Balalara hədiyyə” kitabından bəhs edilib.
Növbəti ekskursiya 239 nömrəli tam orta məktəbin 2-ci sinif şagirdlərinin iştirakı ilə təşkil olunub. Məktəblilər kiçik oxu zalında Larusun ensiklopediyasından olan “Amansız Döyüşçülər”, “Afrika Safarisi” və digər yeni nağıl kitabları ilə tanış olublar.
Ekskursiyaların təşkil olunmasında əsas məqsəd uşaqları Respublika Uşaq Kitabxanasının zəngin kitab fondu ilə yaxından tanış etmək, onlarda mütaliə mədəniyyətini və kitaba olan marağı artırmaqdır.
