Fevral ayında  maarifçi, pedaqoq, ədəbiyyatşünas, Azərbaycan ədəbiyyat tarixçiliyi elminin banisi F.Köçərlinin anadan olmasının 160 illiyi münasibətilə 23, 25, 28, 234, 322  saylı məktəblərin və  Hədəf liseyinin  şagirdlərinin Respublika Uşaq Kitabxanasına ekskursiyası  təşkil olunub.                        

İlk olaraq kitabxana  əməkdaşı məktəbliləri  kitabxana ilə yaxından tanış edib, həmçinin  yeni kitabxana texnologiyalarının tətbiqi , oxucuların dünyagörüşünün, mədəni səviyyəsinin yüksəlməsində kitabların müstəsna rolundan bəhs edib.

F. Köçərlinin uşaq folkloru sahəsində olduqca böyük və əvəzolunmaz xidmətləri vardır. Ədibin "Balalara hədiyyə” kitabı uşaq folklorunun toplanılıb nəşr etdirilməsi yolunda atılmış ən böyük addımdır. Azərbaycan folklorunun ilk antologiyası olan "Balalara hədiyyə” kitabı uşaqların dünyagörüşünün formalaşmasında, həyat və təbiət haqqında təsəvvürlərin yaradılmasında böyük rol oynayıb. Sonda şagirdlərə Firidun bəy Köçərlinin həyat və yaradıcılığından, sonralar onun yolunu davam etdirən ömür-gün yoldaşı Badisəba xanımın fəaliyyətindən, onun Bakıda, Şəkidə internat məktəblərinin açılmasında göstərdiyi müstəsna rolundan bəhs edən sənədli film təqdim edilib.

Ekskursiyaların təşkil olunmasında əsas məqsəd uşaqları  Respublika Uşaq Kitabxanasının zəngin fondu ilə tanış etmək, onlarda  mütaliə mədəniyyətinin  və kitaba  olan marağı artırmaqdır.