15 mart 2022-ci il tarixində F.Köçərli adına Respublika Uşaq Kitabxanasının və Xırdalan şəhər 2 saylı tam orta məktəbin təşkilatçılığı ilə “Xonçalı novruz gəlir” adlı bayram şənliyi keçirildi. Tədbirdə məktəbin 1-ci sinif şagirdləri Novruz bayramına həsr olunmuş ədəbi - bədii kompozisiya ilə çıxış etdilər. Uşaqların ifasında “Mən baharın qızıyam”, “Qaranquş”, “Novruz gəlir, yaz gəlir” mahnıları səsləndi. Bayram süfrəsi ətrafında təşkil edilən musiqili, əyləncəli mərasim balaca fidanların sevincinə səbəb oldu. Keçəl və Kosanın məzəli əhvalatları tədbir iştirakçılarına xoş anlar yaşatdı. Tədbirdə Novruz adətləri icra edildi, uşaqlar “Motal-Motal”, “Əl üstə kimin əli” kimi xalq oyunları oynayıb,yumurta döyüşdürdülər.

Qeyd olundu ki, tədbirin keçirilməsində əsas məqsəd Novruz bayramında xalqımızın milli adət-ənənələrinin gələcək nəsillərə ötürülməsinin və milli-mənəvi dəyərlərimizin qorunub saxlanılmasının vacibliyini şagirdlərin diqqətinə çatdırmaqdan ibarətdir.