10 may tarixində Respublika Uşaq kitabxanasında ulu öndərin anadan olmasının 99-cu ildönümü ilə bağlı “Sən elə bir zirvəsən”  adlı tədbir keçirilib. Tədbirdə Ümummilli Liderin əziz xatirəsi bir dəqiqəlik sükutla yad edilib, Azərbaycanın Dövlət Himni səsləndirilib, həmçinin “Heydər Əliyev və uşaqlar” adlı videoçarx nümayiş olunub.

Ulu öndər Heydər Əliyevin Azərbaycanın müstəqilliyinin möhkəmləndirilməsində və inkişaf yoluna çıxarılmasında böyük xidmətlərindən danışan elmi işlər üzrə direktor müavini Zahirə Dadaşova vurğulayıb ki, Heydər Əliyevin Azərbaycan tarixindəki yeri ölkəmizin qısa müddətdə qazandığı mühüm nailiyyətlərin miqyası qədər böyükdür. Azərbaycanın 44 günlük Vətən müharibəsində qazandığı Şanlı Qələbə də Ulu öndərin ölkəyə rəhbərlik etdiyi dövrlərdə bütün sahələrdə apardığı məqsədyönlü siyasətin nəticəsi idi. Bu qələbə Heydər Əliyev irsinin böyüklüyünü bir daha nümayiş etdirdi. Bu gün Azərbaycan dünyada qalib dövlət kimi tanınır. Heydər Əliyevin vəsiyyəti Dağlıq Qarabağın, Şuşanın yenidən öz sahibinə qaytarılması idi. Bu vəsiyyəti onun layiqli davamçısı, Prezident, Müzəffər Ali Baş Komandan İlham Əliyev reallaşdırdı. 

Digər çıxış edənlər qeyd etdilər ki, Ulu öndərin öz dəyərini həmişə saxlayacaq uzaqgörən siyasəti, parlaq dühası və zəngin irsi Azərbaycanın uğurlu inkişafının təməlində dayanır. Hər bir vətənsevər azərbaycanlının Ümummilli Liderin unudulmaz və əziz xatirəsi qarşısındakı müqəddəs borcu müstəqil və qüdrətli Azərbaycan dövlətini qorumaq və daha da inkişaf etdirməkdən ibarətdir. Müstəqil Azərbaycan var olduqca ulu öndərin irsi ürəklərdə əbədi yaşayacaq və o hər zaman dahi şəxsiyyət kimi xatırlanacaq.