21 oktyabr tarixində “Beynəlxalq Məktəb Kitabxanaları Günü” ilə əlaqədar F. Köçərli adına Respublika Uşaq Kitabxanasında “Yazarlarımızı tanıyaq və mütaliə edək” layihəsi çərçivəsində uşaq yazarı Raziyyə Rəhimzadə ilə görüş keçirildi.

Görüşdə Kaspi liseyinin 3-cü sinif şagirdləri və müəllim heyəti iştirak edirdi. Raziyyə Rəhimzadənin rus dilində nəşr olunmuş “Qədim Bakı haqqında əfsanələr” kitabında  11 hekayəsi yer alıb. Sanki  müəllif  öz hekayələrində bir sehrbaz kimi tarixi Odlar diyarının şəklinin xalçasını toxuyur - burada hər naxış, hər ilgək ayrıdır. Kitabda "Yer planeti hələ çox gənc olanda" kökləri dərin, tarixdən əvvəlki antik dövrü əhatə edən əfsanə, digər mif və əfsanələr, palçıq vulkanları haqqında əfsanələr, muğam, bülbül, qızılgül, çobanyastığı, güvə, Atəşgah, Xəzri və Gilavar, Qız qalası və s., müəllifin orijinal, maraqlı təfsiri ilə təqdim edilmişdir. Müəllif tərəfindən“Qədim Bakı haqqında əfsanələr” kitabı haqqında ətraflı məlumat verildi və oxucuların çoxsaylı sualları cavablandırıldı. Kitabda gənc rəssam Nigar Mustafayevanın rəsmləri yer alıb.

Görüşün sonunda uşaqlarla imza saatı keçirildi və 3-cü sinif şagirdləri yazıçıya özlərinin çəkdiyi rəsmi hədiyyə etdilər. Tədbirin sonunda xatirə şəkilləri çəkildi.