5 aprel tarixində Qazaxıstan Həmzə Yesencanov adına Uşaq və Gənclər Vilayət kitabxanasının təşkilatçılığı ilə “Gənc nəsildə milli adət ənənələrinin aşılanmasında kitabxanaların rolu” adlı beynəlxalq konfrans Zoom platforması üzərindən baş tutdu. Görüşdə MDB ölkə kitabxanalarından 63 nümayəndə iştirak edirdi. Qırğızıstandan Bişkek Uşaq və Gənclər kitabxanası, Rusiyanın Orenburq, Penza Vilayət kitabxanaları, Krım, Belarusiya Respublika uşaq kitabxanaları iştirak edirdi. Məruzələrdə kitabxanalar tərəfindən həyata keçirilən bir sıra tədbirlər, layihələrdən söhbət açıldı. Məruzələr ətrafında hazırlanmış slaydlar nümayiş edildi. Onlayn konfransda F.Köçərli adına Respublika Uşaq kitabxanasının elmi işlər üzrə direktor müavini “Milli dəyərlərimizin qorunması və təbliği işində kitabxanaların rolu” adlı məruzəsi ilə çıxış etdi. Çıxışında bildirdi ki, F.Köçərli adına Respublika Uşaq Kitabxanası “Sərhəd bilməyən incəsənət” layihəsi çərçivəsində 2017-ci ildə Ukrayna Milli Uşaq Kitabxanası ilə Azərbaycan uşaq yazıçısı Solmaz Amanova və xalq rəssamı Arif Hüseynovun iştirak etdiyi “Azərbaycan-Ukrayna: Dostluq kitabdan başlayır”, 2018-ci ildə “Milli musiqi alətlərimiz”, 2019-cu ildə “Milli geyimlər və folklor” adlı virtual görüşlər keçirmişdir. Bu il 16 mart 2022-ci il tarixində İ.Kryange adına Moldova Milli Uşaq Kitabxanası ilə “Sərhəd bilməyən incəsənət” layihəsi çərçivəsində “Novruz – milli-mənəvi dəyərlərimiz” adlı ZOOM platforması üzərindən virtual görüş keçirilmişdir. Novruz bayramı ərəfəsinə keçirilən görüşün əsas məqsədi, ölkə hüdudlarından kənardakı uşaq kitabxanaları ilə sıx əməkdaşlıq etmək, Novruzla əlaqədar milli adət-ənələrimiz haqqında Moldovada yaşayan məktəbli uşaqları məlumatlandırmaq idi. Görüşdə, uşaqlar Novruzla bağlı bayram şənliyi təqdim etdilər, hər iki tərəfi maraqlandıran bütün sualları cavablandırmaqla yanaşı, mövzu ilə əlaqədar geniş formada fikir mübadiləsi aparmaq imkanı əldə etdilər. Moldova məktəbliləri öz növbələrində Moldovada keçirilən Martişor adlı bahar bayramı haqqında ətraflı məlumat verdilər.
Beynəlxalq konfransa yekun vurularaq bildirildi ki, belə görüşlər vasitəsilə dünya kitabxanalarının təcrübəsi öyrənilir və onlara əsaslanaraq, bu istiqamətdə mövcud olan müxtəlif yolların metodikası işlənilərək ən optimal və əlverişlisi hazırlanır.
