F.Köçərli adına Respublika Uşaq Kitabxanası xalq rəssamı Arif Hüseynovun “Qarabağnamə - tarixin səhifələri” adlı qrafika əsərlərini virtual şəkildə istifadəçilərə təqdim edir.
Rəssamın “Qarabağnamə - tarixin səhifələri” adlı virtual sərgisində 45 sənədli-bədii qrafik rəsm əsərlərivə eyniadlı kitabın tam mətni təqdim edilir.
Arif Hüseynovun yaradıcılığında yeni səhifə sayılan “Qarabağnamə - tarixin səhifələri” silsiləsi həm əhatəli tutumuna, həm də bədii şərhinə görə seçilir. Başqa sözlə desək rəssam bu əsərlərdə qədim Albanya dövründən Xocalı faciəsinə qədər davam edən tariximizə işıq sacmışdır. Qarabağ tarixinə bu bədii yanaşmada rəssamı hər şey maraqlandırıb. Qrafik lövhələrdə Qarabağla bağlı müxtəlif hadisələrin, onun qədimliyinə dəlalət edən memarlıq tiklilərinin, maddi-mədəniyyət nümunələrinin, musiqiçilərin və sənətkarların yaradıcılığının əksi də bunu təsdiqləyir.
Əsərlər tarixi materiallara əsaslanır. Silsiləyə daxil olan əsərlərdə Alban kilsəsi, tarixi faktlar, tarixi yerlərin mənzərələri və tarixi şəxsiyyətlərin portretləri təsvir edilir. Əsərlərdə Türkmənçay müqaviləsi, Alban kilsələrinin dəyişdirilməsi, Xocalıya aid kompozisiyalar əks etdirilir. Bu sərgidə nümayiş etdirilən əsərlərin özünəməsusluğu ondadır ki, əsərlərin adları yoxdur. Qrafik əsərlərin üzərində yazılan mətn isə əks etdirilən hadisələri və şəxsiyyətləri təsvir edir. Xalq rəssamının “I Pyotrun məktubu”, “Türkmənçay müqaviləsi”, “Gəncəsər monastrı”, “Güllələnmiş heykəllər”, “Qarabağ müharibəsi”, “Pənahəli xan”, “Xalq musiqiçiləri” kimi əsərlərdə tarixi həqiqətlərin rəssam təxəyyülü ilə uğurlu qovşağından ərsəyə gətirilən təsvirləri kifayət qədər cəlbedici və yaddaqalandır. Sərginin bütün əsərləri qravüra şəklində işlənmişdir. Tarixi həqiqətlər rəssamın incə təxəyyülü vasitəsilə əsərlərində əks etdirilir. Ağ-qara qrafika vizual təsirə malikdir.
Sərginin sonluğu rəngli qrafik rəsm əsəri ilə bitir. Bu da Azərbaycanın 2-ci Qarabağ müharibəsində əldə etdiyi şanlı zəfərinin bir simgəsidir.
Sərgi bütövlükdə tarixi faktlar əsasında qurulub və maarifləndirici xarakter daşıyır. Hər bir Azərbaycan vətəndaşı öz tarixini bilməlidir. Çünki Qarabağ – bizim torpağımız, bizim tariximizdir.
Aşağıdakı linkdən virtual sərgi ilə tanış ola bilərsiniz:
https://www.clb.az/azrbaycann-xalq-rssam-arif-hseynov_d3215.html
