Noyabrın 18-də, Sabunçu rayonunda yerləşən 192 nömrəli tam orta məktəbin 4-cü sinif şagirdləri F.Köçərli adına Respublika Uşaq Kitabxanasına ekskursiya etdilər.  Kitabxananın əməkdaşı uşaqları kitabxana ilə tanış etdi, kitabxanada təşkil olunmuş kitab sərgiləri, elektron kitabxana ilə bağlı məlumat verdi. Uşaqlar kitabxananın bütün şöbələrində oldular, kitabların kitabxana qaydası ilə işlənməsi, oxuculara verilməsi işi ilə bağlı informasiya əldə etdilər. Məktəblilər nağıl otağında “Balaca ev” cizgi filmini izlədilər. Müasir nağıllarımızı müzakirə etdilər. Sonra, 17 noyabr “Milli dirçəliş Günü”-nə həsr olunmuş “Ana Yurdum – Azərbaycan” adlı tədbir keçirildi. Tədbir Azərbaycan Respublikasının Dövlət himninin səsləndirilməsi ilə başladı. Kitabxananın əməkdaşı, tədbir iştirakçılarına 17 noyabr Dirçəliş günü haqqında  məlumat verdi. Tədbir çərçivəsində, məktəblilərin ifasında görkəmli Azərbaycan şairləri Xəlil Rza Ulutürkün “Bayraq”, Məmməd Arazın ”Azərbaycan”, Süleyman Rüstəmin “Azərbaycana gəlsin” və.s şeirləri səsləndi. Uşaqlar “Torpağın səsi”, “Bayraq”, “Şən Azərbaycan”, “İgid Əsgər” mahnılarını ifa etdilər.