Aprelin 24-də, İran İslam Respublikasının Beynəlxalq Uşaq Ədəbiyyatı Şurasının (İBBY) milli bölməsinin əməkdaşı, uşaq yazarı, tərcüməçi, uşaq ədəbiyyatı tədqiqatçısı xanım Nəsim Yusefi Firidun Bəy Köçərli adına Respublika Uşaq Kitabxanasının qonağı oldu. Xanım Nəsim Yusefi “Mənimlə Oxuyun” layihəsi əsasında beynəlxalq proqram hazırlayaraq müxtəlif məkanlarda (uşaq bağçası, uşaq xəstəxanaları və kitabxanalarda) həyata keçirir. Bununla yanaşı, layihə əsasında uşaq mütaliəsinə rəhbərlik edənlərə və bədii qiraətçilərə ustad dərsləri təşkil edir. Xanım Nəsim Yusefi kitabxanada uşaqlara Minu Əmirqasıminin “Xoruz və pişik”, “Hamıdan böyük kimdir” nağıllarını oxudu. Oxunan nağıllar əsasında uşaqlarla diskussiya keçirdi və həmin nağıllara məktəblilər tərəfindən rəsmlər çəkildi. Xanım Nəsim Yusefi kitabxanada olarkən azərbaycan uşaq yazıçılarından Reyhan Yusifqızı, Sevinc Nuruqızı, Solmaz Amanova və Elvira Məmmədova ilə görüş keçirildi. Görüşdə, uşaq ədəbiyyatının inkişafı ilə bağlı fikir mübadiləsi aparıldı. Görüşün sonunda, Xanım Nəsim Yusefiyə kitabxana tərəfindən kitabxananın təsis etdiyi “Göy Qurşağı” uşaq jurnalları və uşaq yazarlarının kitabları hədiyyə olundu. Keçirilən görüşün əsas məqsədi hər iki ölkənin uşaq ədəbiyyatının tanıdılaraq yayımlanmasıdır.