F.Köçərli adına Respublika Uşaq Kitabxanası 11-15 sentyabr tarixlərini bilik həftəsi kimi qeyd edərək “Bir sual – bir məlumat” adlı viktorina keçirdi. Viktorinada kitabxananın fəal oxucuları və Səbail rayonunda yerləşən 189-190 saylı tam orta məktəbin IV sinif şagirdləri iştirak etdi. Bu dəfəki yarışmada sualları iştirakçılara aparıcı yox, məhz mövzu üzrə yığılmış kitab rəflərinin özləri verdi. Belə ki, uşaqlar kitab rəflərinə yaxınlaşaraq orada gizlənmiş sualı tapdılar və cavablandırmağa çalışdılar. Yarışmanı fərqləndirən və əyləncəyə çevirən əsas cəhət sualların dərslikdən və uşaqların oxuduqları sinifdənxaric oxu materiallarından tamamilə fərqli olması idi. “Bir sual – bir məlumat” adlı viktorinanı keçirilməkdə məqsəd uşaqlara bilmədikləri yeni məlumatları çatdırmaq idi. Tədbirdə məktəblilər yaşadığı müddətdə heç vaxt avtomobildən istifadə etməyən insanı, Almaniyanın hansı şəhərində bir qurda və yaxud da pıspısaya verilən pula bir velosiped ala biləcəklərini, bu günə qədər qırmızı rəngi görəndə “əsəbləşdiyini” hesab etdiyimiz öküzləri hirsləndirən əsas səbəbin nə olduğunu, dünyadakı ən uzun menyunun hansı restorana aid olmasını və s. kimi maraqlı sualların cavabını öyrəndilər. Sonda uşaqlara kitabxananın təsis etdiyi “Göy Qurşağı” uşaq jurnalı və 189-190 saylı tam orta məktəbin dördüncü sinif şagirdlərinin sinif kitabxanasına kitablar hədiyyə edildi.