27 may tarixində F.Köçərli adına Respublika Uşaq kitabxanasının 3 saylı filialı Binəqədi rayonundakı H.Cəbrayılov adına 99 saylı tam orta məktəblə birgə “Təbiəti qoruyaq” adlı tədbir keçirdi. Tədbirin aparıcıları ətraf mühit problemləri, təbiətin qorunması ilə bağlı qanun və qaydalar haqqında ətraflı məlumat verdilər. Təbiətin qorunması ilə bağlı uşaqların çəkdikləri rəsmlər, kitabxana əməkdaşları tərəfindən təşkil edilmiş kitab sərgisi iştirakçılar tərəfindən izlənildi. “Ətraf mühit və insan sağlamlığına məişət tullantılarının mənfi təsirini azaldaq” mövzusunda uşaqların çəkdikləri rəsmlər daha maraqla qarşılandı.  Çıxış edənlər ətraf mühitin qorunmasında uşaqların rolundan danışdılar. Qeyd olundu ki, vaxtilə bizə həvalə olunmuş dünyanı biz də gələcək nəsillərə ötürəcəyik. Bu mənada uşaqların ətraf mühitlə bağlı məsələlər haqqında məlumatlandırılması son dərəcə əhəmiyyətlidir. Təbiətlə bağlı məktəblilər şeirlər, mahnılar ifa etdilər, bədii kompozisiya göstərdilər. T.Mütəllibov və T.Bakıxanovun “Gözəlliklər məskəni” mahnısının sədaları altında tədbir sona çatdı.