Yanvarın 29- də F.Köçərli adına Respublika Uşaq Kitabxanasında, Sabunçu rayon 192 nömrəli tam orta məktəbin 4-cü sinif şagirdləri ilə birgə Azərbaycanın tanınmış ədəbiyyatşünası, pedaqoq və publisist Firidun bəy Köçərlinin anım gününə həsr olunmuş “Böyük maarifpərvər Firidun bəy Köçərli” adlı tədbir keçirildi. Tədbir çərçivəsində məktəblilərin təqdimatında F.Köçərlinin həyat və fəaliyyəti haqqında məlumat verildi, “Balalara hədiyyə” kitabından şeirlər, atalar sözləri, məsəllər, laylalar, tapmacalar, müdrik kəlamlar səsləndirildi, mahnılar ifa olundu, rəqslər təqdim edildi. Uşaqlar “Qarı və buz”, “Pıspısa xanım və Siçanbəy” nağılı və “Darı və Buğda” təmsili əsasında hazırlanmış səhnəciklər göstərdilər. Tədbirdə çıxış edən kitabxananın elmi işlər üzrə direktor müavini Zahirə Dadaşova məktəbliləri məharətli çıxışları üçün təbrik etdi və Azərbaycan uşaq ədəbiyyatı antologiyasının banisi Firidun bəy Köçərlinin həyat fəaliyyətinin öyrənilməsinin olduqca əhəmiyyətli olduğunu diqqətə çatdırdı. Sonda tədbirdə iştirak edən uşaqlara kitabxana tərəfindən təsis edilən “Göy Qurşağı” uşaq jurnalı hədiyyə edildi.