Aprelin 9-da, Mədəniyyət Nazirliyinin dəstəyi və Firidun bəy Köçərli adına Respublika Uşaq Kitabxanasının təşkilatçılığı ilə, görkəmli ədəbiyyatşünas alim F.Köçərlinin 174 səhifəlik fundamental biblioqrafiya kitabının əsasında hazırlanan “Elektron məlumat bazası” oxuculara təqdim edildi. AMEA-nın Mərkəzi Elmi Kitabxanasında reallaşan tədbir çərçivəsində, 11 bölmədən ibarət olan F.Köçərli adlı Elektron məlumat bazasında ədibin həyat və fəaliyyətinin əsas tarixləri, F.Köçərlinin müdrik deyimləri, görkəmli şəxsiyyətlərin şair haqqında söylədiyi fikirləri, əsərləri, xatirəsinin əbədiləşdirilməsi, F.Köçərliyə həsr edilmiş şeirlər, fotoqalereya və videoqalereya bölmələri haqqında ətraflı məlumat verildi. Ümumilikdə baza 1911-2018- ci illəri əhatə edir. Kitabxananın direktoru, Əməkdar mədəniyyət işçisi Şəhla Qəmbərova çıxışında, F.Köçərli ilə yanaşı digər şair və yazıçıların elektron məlumat bazalarının yaradılması istiqamətində görülən işlərdən, hazırlanan biblioqrafiyaların tərtibatında müxtəlif kitabxanaların fondlarından bəhrələndiklərini qeyd edib. Tədbirdə, Bakı Dövlət Universitetinin dosenti Nəzakət Hüseynova, Milli Kitabxananın direktor müavini Ədibə İsmayılova, tədqiqatçı Pərixanım Mikayılqızı və Ombudsman aparatından Azadə Novruzova çıxışlarında F.Köçərlinin uşaq ədəbiyyatı ilə bağlı yaradıcılığından bəhs etdilər. Tədbirdə, kitabxanaçılar, pedaqoqlar, tələbələr, oxucular və. s qonaqlar iştirak edib.