27 Avqust 2018-ci il tarixində, Trio tədris, İncəsənət və İdman Mərkəzinin müxtəlif sinif şagirdləri F.Köçərli adına Respublika Uşaq Kitabxanasına ekskursiya etdilər. Kitabxananın əməkdaşı uşaqları kitabxana ilə tanış etdi, kitabxanada təşkil olunmuş kitab sərgiləri, elektron kitabxana ilə bağlı məlumat verdi. Uşaqlar kitabxananın bütün şöbələrində oldular, kitabların kitabxana qaydası ilə işlənməsi, oxuculara verilməsi işi ilə yaxından tanış oldular. Sonra nağıl otağında Azərbaycan nağıllarını dinlədilər, bir sıra cizgi filmləri izləyib, müasir nağıllarımızı müzakirə etdilər. Oxu zalında kitablarla bağlı maraqlı çarxlı video izlədilər. Balacalar kiçik oxu zalında “Danışan kitablar”la, qeyri-adi formalı – panoramalı, hissiyatlı, səhifələndikcə özü oxuyan, səsli düymələrlə idarə olunan və s. kitablarla tanış oldular. Kitabxanada səmərəli vaxt keçirən uşaqlar, oxucuların rəy və təkliflər kitabına öz fikirlərini qeyd etdilər. Kitab dünyasına səyahət edən uşaqlara kitabxana tərəfindən təsis edilən “Göy Qurşağı” uşaq jurnalı və biri-birindən maraqlı kitablar hədiyyə olundu. Kitabxananın yeni oxucuları gözəl təəssüratlarla kitabxanadan ayrıldılar.