20 dekabr 2018-ci ildə Azərbaycan Respublikası Silahlı Qüvvələrinin Təlim və Tədris Mərkəzinin klubunda F.Köçərli adına Respublika Uşaq Kitabxanası və Cəmşid Naxçıvanski adına Hərbi liseyin birgə təşkilatçılığı ilə Azərbaycan Silahlı Qüvvələrinin Yaranmasının 100 illik yubileyinə həsr olunmuş “Açıq dərs - Açıq fikir” layihəsi çərçivəsində “Ordum varsa - Yurdum var” adlı tədbir keçirildi. Ümummilli lider Heydər Əliyevin əziz xatirəsi və Azərbaycanın azadlığı uğrunda canlarından keçmiş şəhidlərimizin əziz ruhu 1 dəqiqəlik sükutla yad edildi. Tədbiri giriş sözü ilə C.Naxçıvanski adına Hərbi Liseyin rəisi general-mayor Bəkir Orucov açaraq, ordumuzun tarixi haqqında geniş məlumat verdi. Ümummilli lider Heydər ƏIliyev və onun siyasi kursunun layiqli davamçısı İlham Əliyevin ordumuza olan diqqət və qayğısını əks etdirən video-slayd nümayiş olundu. Tədbirdə Cümhuriyyət dövründə yaranmış Milli Ordumuzun tarixini əhatə edən kompozisiya və sual-cavablar təqdim olundu. Münsiflər heyəti tərəfindən hərb tariximiz haqqında suallara düzgün cavab verən kursantlar I, II, III yer olmaqla qiymətləndirildi. Tədbirin keçirilməsində əsas məqsəd, gənc nəslin hərbi vətənpərlik ruhunda tərbiyələndirilməsi, tarixə düşən Azərbaycan generallarının keçdiyi ömür yolunu öyrənmək, yeniyetmələrdə hərbi vətənpərvərlik hissini alovlandırmaq, milli mənəvi hissləri daha yüksək şəkildə dəyərləndirmək, müstəqillik və azadlıq yolunda mücadilələri xatırlatmaq, hərbi vətənpərvərlik tərbiyəsi işində onlara dəstək olmaqdır. Sonra söz F.Köçərli adına Respublika Uşaq Kitabxanasının direktoru əməkdar mədəniyyət işçisi Ş.Qəmbərovaya verildi. Ş.Qəmbərova “Açıq dərs – Açıq fikir” layihəsi haqqında geniş və ətraflı məlumat verdi. Tədbirdə iştirak edən iştirakçılar diplom, fəxri fərmanlar, hədiyyələrlə mükafatlandırıldılar. Tədbirdə tarixçi alim Firdövsiyyə Əhmədova, Ali Hərbi Akademiyanın ehtiyatda olan polkovniki Mehman Süleymanov, tarixçi professor Tofiq Nəcəfli, Bakı Dövlət Universitetinin tarix fakultəsinin professoru Rafiq Qurbanov, hərbçi generallar, kursantlar, müdavimlər, zabitlər və s. qonaqlar iştirak etdilər. Sonda qonaqlar F.Köçərli adına Respublika Uşaq Kitabxanası tərəfindən tərtib edilmiş “Ordum varsa - Yurdum var” adlı kitab sərgisi ilə tanış oldular.